ਅਫਸਰਸ਼ਾਹੀ ਤੋਂ ਤੰਗ ਆਏ ਸ਼ੈਲਰ ਮਾਲਕਾਂ ਨੇ ਕੀਤਾ ਹਾਈਵੇ ਜਾਮ
ਸ਼ੈਲਰ ਮਾਲਕਾਂ ਨੇ ਵੇਅਰਹਾਊਸ ਦੇ ਅਧਿਕਾਰੀਆਂ 'ਤੇ ਲਗਾਏ ਰਿਸ਼ਵਤ ਮੰਗਣ ਦੇ ਦੋਸ਼
ਖੰਨਾ, 19 ਦਸੰਬਰ (ਪਰਮਜੀਤ ਸਿੰਘ ਧੀਮਾਨ) : ਅੱਜ ਖੰਨਾ-ਨਵਾਂ ਸ਼ਹਿਰ ਹਾਈਵੇ 'ਤੇ ਅਫਸ਼ਰਸ਼ਾਹੀ ਤੋਂ ਤੰਗ ਆਏ ਖੰਨਾ ਇਲਾਕੇ ਦੇ ਸ਼ੈਲਰ ਮਾਲਕਾਂ ਨੇ ਟਰੱਕ ਡਰਾਇਵਰਾਂ ਅਤੇ ਲੇਬਰ ਦੀ ਮਦਦ ਨਾਲ ਜਾਮ ਲਗਾ ਦਿੱਤਾ। ਸ਼ੈਲਰਾਂ ਵਾਲਿਆਂ ਨੇ ਵੇਅਰ ਹਾਊਸ ਦੇ ਅਫਸਰਾਂ ਖਿਲਾਫ ਜੰਮ ਕੇ ਨਾਅਰੇਬਾਜ਼ੀ ਕੀਤੀ। ਇਸ ਮੌਕੇ 'ਤੇ ਗੱਲਬਾਤ ਕਰਦਿਆਂ ਸ਼ੈਲਰ ਐਸੋ. ਦੇ ਪ੍ਰਧਾਨ ਗੁਰਦਿਆਲ ਸਿੰਘ ਦਿਆਲੀ, ਭਾਜਪਾ ਆਗੂ ਰਾਜੇਸ਼ ਡਾਲੀ, ਆੜ੍ਹਤੀ ਐਸੋ. ਦੇ ਪ੍ਰਧਾਨ ਸੁਖਵਿੰਦਰ ਸਿੰਘ ਚੀਮਾ ਨੇ ਦੱਸਿਆ ਕਿ ਖੰਨਾ ਸ਼ਹਿਰ ਏਸ਼ੀਆ ਦੀ ਸਭ ਤੋਂ ਵੱਡੀ ਅਨਾਜ ਮੰਡੀ ਹੋਣ ਕਰਕੇ ਇਥੇ ਸ਼ੈਲਰਾਂ ਦੀ ਗਿਣਤੀ 58 ਹੈ। ਰੋਜ਼ਾਨਾ ਹੀ ਹਜਾਰਾਂ ਦੀ ਤਾਦਾਦ ਵਿੱਚ ਟਰੱਕ ਸ਼ੈਲਰਾਂ 'ਚੋਂ ਚਾਵਲ ਭਰ ਕੇ ਵੇਅਰਹਾਊਸ ਦੇ ਗੋਦਾਮਾਂ ਵਿੱਚ ਲਗਾਉਂਦੇ ਹਨ, ਪਰ ਵੇਅਰ ਹਾਊਸ ਦੇ ਭ੍ਰਿਸ਼ਟ ਅਫਸਰ ਜਿਹਨਾਂ ਵਿੱਚ ਲਖਵੀਰ ਸਿੰਘ, ਜੰਗ ਸਿੰਘ, ਰਘਬੀਰ ਸਿੰਘ ਅਤੇ ਰਾਮਪਾਲ ਉਹਨਾਂ ਤੋਂ ਸ਼ਰੇਆਮ ਰਿਸ਼ਵਤ ਮੰਗਦੇ ਹਨ। ਉਨ੍ਹਾਂ ਦੋਸ਼ ਲਗਾਉਂਦਿਆਂ ਕਿਹਾ ਕਿ ਉਕਤ ਅਫਸਰ ਪ੍ਰਤੀ ਟਰੱਕ ਇੱਕ ਹਜਾਰ ਰੁਪਏ ਅਤੇ 50 ਕਿੱਲੋ ਚਾਵਲ ਮੰਗਦੇ ਹਨ। ਜਦੋਂ ਉਹ ਦੇਣ ਤੋਂ ਮਨਾ ਕਰਦੇ ਹਨ ਤਾਂ ਉਹਨਾਂ ਨੂੰ ਅਸਿੱਧੇ ਤਰੀਕੇ ਨਾਲ ਪ੍ਰੇਸ਼ਾਨ ਕੀਤਾ ਜਾਂਦਾ ਹੈ। ਸ਼ੈਲਰ ਵਾਲਿਆਂ ਨੇ ਤਕਰੀਬਨ ਦੋ ਘੰਟੇ ਸੜਕ ਜਾਮ ਕੀਤੀ, ਇਸ ਨਾਲ ਰਾਹਗੀਰਾਂ ਅਤੇ ਖਾਸ ਕਰ ਕਾਲਜ ਦੇ ਵਿਦਿਆਰਥੀਆਂ ਨੂੰ ਭਾਰੀ ਦਿੱਕਤ ਦਾ ਸਾਹਮਣਾ ਕਰਨਾ ਪਿਆ। ਬਾਅਦ ਵਿੱਚ ਪੁਲੀਸ ਦੇ ਉੱਚ ਅਧਿਕਾਰੀਆਂ ਨੇ ਆ ਕੇ ਜਾਮ ਖੁੱਲ੍ਹਵਾਇਆ ਅਤੇ ਵੇਅਰ ਹਾਊਸ ਦੇ ਅਧਿਕਾਰੀਆਂ ਨਾਲ ਮੀਟਿੰਗ ਕਰਵਾਈ। ਮੀਟਿੰਗ ਦੌਰਾਨ ਅਧਿਕਾਰੀਆਂ ਨੇ ਸਾਰੀਆਂ ਮੰਗਾਂ ਮੰਨ ਲਈਆਂ। ਸ਼ੈਲਰ ਮਾਲਕਾਂ ਤੋਂ ਰਿਸ਼ਵਤ ਮੰਗਣ ਦੇ ਦੋਸ਼ਾਂ 'ਤੇ ਪ੍ਰਤੀਕਰਮ ਲੈਣ ਲਈ ਜਦੋਂ ਵੇਅਰ ਹਾਊਸ ਦੇ ਉਕਤ ਅਧਿਕਾਰੀ ਨਾਲ ਫੋਨ ਤੇ ਗੱਲ ਕੀਤੀ ਤਾਂ ਮੈਨੇਜਰ ਜੰਗ ਸਿੰਘ ਨੇ ਦੱਸਿਆ ਕਿ ਅਜਿਹੀ ਕੋਈ ਗੱਲ ਨਹੀਂ ਅਸੀਂ ਕਾਨੂੰਨ ਅਨੁਸਾਰ ਹੀ ਚਾਵਲ ਲੈਂਦੇ ਹਾਂ, ਸ਼ੈਲਰਾਂ ਵਾਲੇ ਆਪਣੀਆਂ ਗਲਤੀਆਂ ਛੁਪਾਉਣ ਲਈ ਸਾਡੇ 'ਤੇ ਝੂਠੇ ਇਲਜ਼ਾਮ ਲਗਾਉਂਦੇ ਹਨ।
ਫੋਟੋ: ਖੰਨਾ-ਨਵਾਂ ਸ਼ਹਿਰ ਹਾਈਵੇ ਨੂੰ ਜਾਮ ਕਰਕੇ ਨਾਅਰੇਬਾਜ਼ੀ ਕਰਦੇ ਹੋਏ ਸ਼ੈਲਰਾਂ ਦੇ ਮਾਲਕ। ਫੋਟੋ : ਪਰਮਜੀਤ ਸਿੰਘ ਧੀਮਾਨ
ਸ੍ਰੋਤ - ਪਰਮਜੀਤ ਧੀਮਾਨ ਖੰਨਾ
No comments:
Post a Comment